ຂປລ.ໂດຍຕອບສະໜອງຕາມການເຊື້ອເຊີນຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະຫາຍ ສີ ຈິ້ນຜິງ ເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ, ພ້ອມດ້ວຍຄະນະຜູ້ແທນຂັ້ນສູງພັກ, ລັດ ແຫ່ງ ສາທາລະນະລັດ ປະຊາຊົນຈີນ ໄດ້ເດີນທາງມາເຖິງນະຄອນຫລວງວຽງຈັນ ເພື່ອດໍາເນີນການຢ້ຽມຢາມທາງລັດຖະກິດ ສປປ ລາວ ໃນລະຫວ່າງ ວັນທີ 13-14 ພະຈິກ 2017.
ອອກຮັບ ສະຫາຍເລຂາທິການໃຫຍ່ ສີ ຈິ້ນຜິງ ແລະ ຄະນະ ໃນຕອນບ່າຍຂອງວັນທີ 13 ພະຈິກ ທີ່ ສະໜາມບິນສາກົນວັດໄຕ, ມີສະຫາຍ ພັນຄໍາ ວິພາວັນ, ກຳມະການກົມການເມືອງສູນກາງພັກ, ຜູ້ປະຈໍາການ ຄະນະເລຂາທິການສູງກາງພັກ, ຮອງປະທານປະເທດ ແຫ່ງ ສປປ ລາວ; ສະຫາຍ ສິນລະວົງ ຄຸດໄພທູນ, ກໍາມະການກົມການເມືອງສູນກາງພັກ, ເລຂາຄະນະພັກນະຄອນຫລວງ, ເຈົ້າຄອງນະຄອນຫລວງວຽງຈັນ; ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ; ສະຫາຍ ນາງ ສູນທອນ ໄຊຍະຈັກ ກໍາມະການສູນກາງພັກ, ຫົວຫນ້າຄະນະພົວພັນ ຕ່າງປະເທດສູນກາງພັກ, ພ້ອມດ້ວຍບັນດາສະຫາຍ ໃນຄະນະຕ້ອນຮັບຂອງຝ່າຍລາວ; ເອກອັກຄະລັດຖະທູດ ສປ ຈີນ ແລະ ພະນັກງານສະຖານທູດ ສປ ຈີນ ປະຈໍາລາວ ແລະ ມີຊາວໜຸ່ມ, ເຍົາວະຊົນ, ນັກສຶກສາລາວ ແລະ ມວນຊົນຊາວນະຄອນຫລວງວຽງຈັນ ແລະ ຊາວຈີນ ຈຳນວນຫລວງຫລາຍ, ໄດ້ຢືນໂບກທຸງຊາດ ຂອງສອງປະເທດ ເພື່ອຂ່ຳນັບຊົມເຊີຍການເດີນທາງມາເຖິງນະຄອນຫລວງວຽງຈັນ ຂອງຄະນະຢ່າງຄຶກຄື້ນ ຕາມເສັ້ນທາງຈາກສະໜາມບິນ ຫາ ໂຮງແຮມແລນມາກ.
ພິທີຕ້ອນຮັບ ສະຫາຍ ສີ ຈິ້ນຜິງ ພ້ອມດ້ວຍຄະນະຜູ້ແທນຂັ້ນສູງພັກ, ລັດ ສປ ຈີນ ຢ່າງເປັນທາງການໄດ້ຈັດຂຶ້ນຢ່າງສົມກຽດ ທີ່ທຳນຽບປະທານປະເທດ ໃນຕອນບ່າຍຂອງວັນທີ 13 ພະຈິກ 2017, ໂດຍສະຫາຍ ເລຂາທິການໃຫຍ່ ບຸນຍັງ ວໍລະຈິດ, ຊຶ່ງມີບັນດາສະຫາຍການນຳຂັ້ນສູງ ພັກ-ລັດ ຂອງ ສປປ ລາວ ເຂົ້າຮ່ວມຢ່າງພ້ອມພຽງ. ສະຫາຍ ບຸນຍັງ ວໍລະຈິດ ໄດ້ນຳພາ ສະຫາຍ ເລຂາທິການໃຫຍ່ ສີ ຈິ້ນຜິງ ໄປຍັງແທ່ນກຽດຕິຍົດເພື່ອເຄົາລົບທຸງຊາດຈີນ, ລາວ ຕາມລຳດັບ; ຕໍ່ຈາກນັ້ນ, ສະຫາຍ ບຸນຍັງ ວໍລະຈິດ ແລະ ສະຫາຍ ສີ ຈິ້ນຜິງ ຍ່າງກວດແຖວທະຫານກອງກຽດຕິຍົດກອງທັບປະຊາຊົນລາວ ແລະ ຜູ້ນໍາທັງສອງສະຫາຍ ໄດ້ຮັບການແນະນໍາຕໍ່ຄະນະຕ້ອນຮັບທາງການຝ່າຍ ສປປ ລາວ ແລະ ຄະນະຜູ້ແທນຂັ້ນສູງຂອງ ສປ ຈີນ ໃນພິທີດັ່ງກ່າວ. ພາຍຫລັງສໍາເລັດພິທີຕ້ອນຮັບຢ່າງເປັນທາງການ, ສະຫາຍ ບຸນຍັງ ວໍລະຈິດ ແລະ ສະຫາຍ ສີ ຈິ້ນຜິງ ໄດ້ນໍາພາຄະນະຜູ້ແທນຂັ້ນສູງພົບປະສອງຝ່າຍ, ຊຶ່ງຈັດຂຶ້ນຢູ່ຫ້ອງປະຊຸມ ທີ່ທຳນຽບປະທານປະເທດ. ການຢ້ຽມຢາມທາງລັດຖະກິດ ສປປ ລາວ ຂອງສະຫາຍ ເລຂາທິການໃຫຍ່ ສີ ຈິ້ນຜິງ ໃນຄັ້ງນີ້, ເປັນຂີດໝາຍປະຫວັດສາດສໍາຄັນ ແຫ່ງການຮັດແໜ້ນສາຍພົວພັນ ແລະ ເສີມຂະຫຍາຍການເປັນຄູ່ຮ່ວມ ຍຸດທະສາດຮອບດ້ານໝັ້ນຄົງ ຍາວນານຕາມທິດ 4 ດີ ທີ່ມີມູນເຊື້ອແຫ່ງມິດຕະພາບ ແລະ ການຮ່ວມມື ອັນໜັກແໜ້ນຍາວນານ ມາແລ້ວນັ້ນ ໃຫ້ສືບຕໍ່ຂະຫຍາຍຕົວຢ່າງບໍ່ຢຸດຢັ້ງ.
ໃນການພົບປະຄັ້ງນີ້, ສະຫາຍ ບຸນຍັງ ວໍລະຈິດ ໄດ້ກ່າວສະແດງຄວາມຍິນດີຕ້ອນຮັບ ສະຫາຍ ສີ ຈິ້ນຜິງ ພ້ອມດ້ວຍຄະນະຜູ້ແທນຂັ້ນສູງ ພັກ-ລັດ ສປ ຈີນ ດ້ວຍໄມຕີຈິດມິດຕະພາບ ອັນອົບອຸ່ນ ແລະ ສະ ແດງຄວາມປິຕິຊົມຊື່ນເປັນຢ່າງຍິ່ງ ທີ່ໄດ້ພົບປະກັບ ສະຫາຍ ເລຂາທິການໃຫຍ່, ປະທານປະເທດ ສປ ຈີນ, ທີ່ໄດ້ນໍາພາຄະນະຜູ້ແທນຂັ້ນສູງພັກ-ລັດ ມາຢ້ຽມຢາມທາງລັດຖະກິດ ສປປ ລາວ ພາຍຫລັງທີ່ພັກກອມມູນິດຈີນ ຫາກໍ່ສໍາເລັດກອງປະຊຸມໃຫຍ່ ຄັ້ງທີ 19 ຂອງພັກຢ່າງສະຫງ່າງາມ ແລະ ໃນບັນຍາກາດ ທີ່ການພົວພັນມິດຕະພາບ ທີ່ເປັນມູນເຊື້ອອັນດີງາມ ແລະ ແບບຄູ່ຮ່ວມຍຸດທະສາດຮອບດ້ານ ລາວ-ຈີນ ພວມຢູ່ໃນໄລຍະທີ່ໄດ້ຮັບການເສີມຂະຫຍາຍຢ່າງຕັ້ງໜ້າ; ພ້ອມດຽວກັນນີ້, ສະຫາຍ ບຸນຍັງ ວໍລະຈິດ ກໍໄດ້ສະແດງຄວາມຊົມເຊີຍ ແລະ ອວຍພອນໄຊຢ່າງຈິງໃຈຕໍ່ ສະຫາຍ ສີ ຈິ້ນຜິງ ທີ່ໄດ້ຮັບການເລືອກຕັ້ງເປັນເລຂາ ທິການໃຫຍ່ ຄະນະກໍາມະການສູນກາງພັກກອມມູນິດຈີນ ອີກສະໄໝໜຶ່ງ, ເຊິ່ງເປັນການສະແດງ ໃຫ້ເຫັນຄວາມໄວ້ວາງໃຈ, ຄວາມເຊື່ອໝັ້ນຢ່າງສູງຂອງທົ່ວພັກ ທີ່ມີຕໍ່ສະຫາຍ ເຊິ່ງເປັນຜູ້ມີປະສົບການ ໃນການນໍາພາອັນໂດດເດັ່ນ ໃນໄລຍະ 5 ປີ ທີ່ຜ່ານມາ ໃນການສ້າງສາພັດທະນາ ຕາມທິດສັງຄົມນິຍົມ ຕາມສີສັນພິເສດຂອງຈີນ ແລະ ໄດ້ຮັບຜົນສໍາເລັດຢ່າງສູງ ແລະ ແບບກະໂດດຂັ້ນ ເປັນທີ່ປະຈັກຕາຕໍ່ສາກົນ. ສະຫາຍ ບຸນຍັງ ວໍລະຈິດ ໄດ້ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງ ສະຫາຍ ເລຂາທິການໃຫຍ່ ສີ ຈິ້ນຜິງ, ເຊິ່ງເປັນການສະແດງເຖິງຄວາມເອົາໃຈໃສ່ ແລະ ໃຫ້ຄວາມສໍາຄັນຂອງພັກກອມມູນິດຈີນ, ລັດຖະບານຈີນ ຕໍ່ສາຍພົວພັນ ມິດຕະພາບທີ່ເປັນມູນເຊື້ອ ແລະ ແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດ, ເຊິ່ງເປັນການນໍາເອົາສາຍພົວພັນດັ່ງກ່າວ ກ້າວສູ່ລະດັບສູງອັນໃໝ່ ແລະ ສະແດງຄວາມເຊື່ອໝັ້ນວ່າ ການຢ້ຽມຢາມຄັ້ງນີ້ ຈະເປັນໂອກາດດີທີ່ສຸດ ໃຫ້ແກ່ການນໍາຂັ້ນສູງຂອງ 2 ປະເທດ ລາວ-ຈີນ ເພື່ອຮ່ວມກັນຕີລາຄາ ກ່ຽວກັບ ການພົວພັນຮ່ວມມືສອງຝ່າຍ ໃນໄລຍະຜ່ານມາ ແລະ ປືກສາຫາລື ກ່ຽວກັບທິດທາງ ການຮ່ວມມື ໃນຕໍ່ໜ້າ ໃນການເປັນຄູ່ຮ່ວມຊາຕາກໍາ ລະຫວ່າງ ສອງພັກ, ສອງລັດ ຢູ່ໃນສະພາບການໃໝ່.
ສະຫາຍ ບຸນຍັງ ວໍລະຈິດ ໄດ້ຕີລາຄາສູງຜົນສໍາເລັດຂອງການດໍາເນີນກອງປະຊຸມໃຫຍ່ ຄັ້ງທີ XIX ຂອງພັກ, ເຊິ່ງໃນນັ້ນ ໄດ້ມີການກໍານົດເອົາແນວຄິດ ສີ ຈິ້ນຜິງ ກ່ຽວກັບສັງຄົມນິຍົມ ທີ່ມີສີສັນພິເສດຂອງຈີນ ເປັນແນວຄິດຊີ້ນໍາຂອງພັກກອມມູນິດຈີນ ແລະ ອວຍພອນໃຫ້ປະຊາຊົນຈີນ ພາຍໃຕ້ການນໍາພາ ອັນສະຫລາດສ່ອງໃສຂອງພັກ ຈົ່ງບັນລຸຜົນສໍາເລັດໃໝ່ໃຫຍ່ຫລວງກວ່າເກົ່າ ໃນການສ້າງສັງຄົມນິຍົມທີ່ຮັ່ງມີ, ເຂັ້ມແຂງ, ຈະເລີນຮຸ່ງເຮືອງ, ກົມກຽວປອງດອງ, ປະຊາທິປະໄຕ, ສີວິໄລ ແລະ ສວຍງາມ.
ສະຫາຍ ເລຂາທິການໃຫຍ່ ບຸນຍັງ ວໍລະຈິດ ໄດ້ຕາງໜ້າໃຫ້ພັກ-ລັດ ແລະ ປະຊາຊົນລາວ ບັນດາເຜົ່າສະແດງຄວາມຮູ້ບຸນຄຸນ ແລະ ຂອບໃຈຕໍ່ພັກ-ລັດ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫລືອອັນລໍ້າຄ່າ, ໃຫ້ການສະໜັບສະໜູນອັນໃຫຍ່ຫລວງ ແກ່ປະຊາຊົນລາວ ໃນພາລະກິດຕໍ່ສູ້ ເພື່ອຍາດເອົາເອກະລາດແຫ່ງຊາດ ແລະ ໃນການປົກປັກຮັກສາ ແລະ ສ້າງສາ ສປປ ລາວ ໃນປັດຈຸບັນ.
ໂອກາດດຽວກັນນີ້, ສະຫາຍ ເລຂາທິການໃຫຍ່ ສີ ຈິ້ນຜິງ ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບຄະນະຜູ້ແທນຂັ້ນສູງ ພັກ-ລັດ ສປ ຈີນ ຢ່າງອົບອຸ່ນ ເຕັມໄປດ້ວຍໄມຕີຈິດ ມິດຕະພາບທີ່ສະໜິດສະໜົມຂອງ ສະຫາຍ ບຸນຍັງ ວໍລະຈິດ ແລະ ການນໍາຂັ້ນສູງຂອງລາວ ພ້ອມດ້ວຍມວນຊົນ ຊາວນະຄອນຫລວງວຽງຈັນ ຢ່າງຫລວງຫລາຍ ແລະ ໄດ້ກ່າວສະແດງຄວາມປິຕິຍິນດີເປັນຢ່າງຍິ່ງ ທີ່ໄດ້ນຳພາຄະນະຜູ້ແທນຂັ້ນສູງ ພັກ-ລັດ ສປ ຈີນ ເດີນທາງມາຢ້ຽມຢາມທາງລັດຖະກິດ ສປປ ລາວ ເປັນຄັ້ງທຳອິດໃນຖານະເປັນເລຂາທິການໃຫຍ່ອີກຄັ້ງໃໝ່ ໃນກອງປະຊຸມໃຫຍ່ ຄັ້ງທີ XIX ຂອງພັກກອມມູນິດຈີນ, ເຊິ່ງເປັນການສະແດງ ໃຫ້ເຫັນເຖິງການໃຫ້ຄວາມສໍາຄັນ ແລະ ເອົາໃຈໃສ່ຕໍ່ການຊຸກຍູ້ສົ່ງເສີມ ສາຍພົວພັນມິດຕະພາບອັນເປັນມູນເຊື້ອ ແລະ ແບບຄູ່ຮ່ວມ ຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ທີ່ນັບມື້ນັບໄດ້ຮັບການເສີມຂະຫຍາຍ, ແຕກດອກອອກຜົນຍິ່ງໆ ຂຶ້ນຕະຫລອດມາ. ພ້ອມດຽວກັນນັ້ນ, ສະຫາຍ ສີ ຈິ້ນຜິງ ກໍໄດ້ຊົມເຊີຍປະຊາຊົນລາວອ້າຍນ້ອງ ພາຍໃຕ້ການນຳພາຂອງພັກປະຊາຊົນ ປະຕິວັດລາວ ໂດຍມີ ສະຫາຍ ບຸນຍັງ ວໍລະຈິດ ເປັນຜູ້ນໍາໜ້າທີ່ຍາດໄດ້ຜົນສໍາເລັດອັນໃຫຍ່ ໃນການພັດທະນາເສດຖະກິດ-ສັງຄົມ ໃນໄລຍະຜ່ານມາ ແລະ ໄດ້ຢືນຢັນວ່າ ສປ ຈີນ ຈະຮ່ວມກັບ ສປປ ລາວ ສືບຕໍ່ເພີ່ມພູນຄູນສ້າງສາຍພົວພັນ ແລະ ຮ່ວມມືດັ່ງກ່າວ ໃຫ້ນັບມື້ເກີດດອກອອກຜົນ ຢ່າງບໍ່ຢຸດຢັ້ງ.
ສອງຝ່າຍໄດ້ຮ່ວມກັນທົບທວນຄືນ ແລະ ຕີລາຄາສູງ ກ່ຽວກັບການພົວພັນຮ່ວມມືສອງຝ່າຍ ໃນໄລຍະຜ່ານມາ, ເຊິ່ງໄດ້ຮັບການເສີມຂະຫຍາຍທັງທາງກວ້າງ ແລະ ລວງເລິກ. ປະເທດບ້ານໃກ້ເຮືອນຄຽງທີ່ດີ, ລາວ-ຈີນ ລ້ວນແຕ່ເປັນປະເທດສັງຄົມນິຍົມ ທີ່ມີພັກກອມມູນິດນໍາພາ, ມີອຸດົມການ, ລະບອບການເມືອງ, ເສັ້ນທາງແຫ່ງການພັດທະນາທີ່ຄ້າຍກັນ, ສອງຝ່າຍ ໄດ້ຢຶດໝັ້ນທິດທາງ ການພົວພັນແບບຄູ່ຮ່ວມ ຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ, ເປັນຄູ່ຮ່ວມຊາຕາກໍາສັງຄົມນິຍົມ ລາວ-ຈີນ ທີ່ບໍ່ສາມາດຕັດແຍກອອກຈາກກັນໄດ້. ການພົວພັນດ້ານການເມືອງ ໄດ້ມີການເສີມຂະຫຍາຍເປັນຢ່າງດີ ແລະ ໄດ້ເປັນພື້ນຖານອັນດີ ໃຫ້ແກ່ການເສີມຂະຫຍາຍສາຍພົວພັນສອງຝ່າຍ ໃນດ້ານຕ່າງໆ. ການພົວພັນຮ່ວມມືດ້ານທິດສະດີ, ບົດຮຽນການປົກຄອງລັດ-ບໍລິຫານປະເທດ, ການກໍ່ສ້າງພັກ, ການຮ່ວມມືດ້ານເສດຖະກິດ, ການຄ້າ-ການລົງທຶນ ແລະ ອື່ນໆ. ນັບມື້ມີບາດກ້າວຂະຫຍາຍຕົວ ໄປສູ່ຄຸນນະພາບໃໝ່, ພວມນໍາຜົນປະໂຫຍດຕົວຈິງ ໃຫ້ແກ່ປະຊາຊົນສອງຊາດ ລາວ-ຈີນ. ພ້ອມດຽວກັນນີ້, ທັງສອງຝ່າຍເຫັນດີ ສືບຕໍ່ຮັກສາກົນໄກການແລກປ່ຽນ ການຢ້ຽມຢາມ ລະຫວ່າງ ການນໍາຂັ້ນສູງ ລະຫວ່າງ 2 ພັກ ແລະ 2 ລັດ ຢ່າງເປັນປົກກະຕິ; ເອົາໃນໃສ່ເສີມຂະຫຍາຍກົນໄກ ການຮ່ວມມືຂອງສອງຝ່າຍ ທີ່ມີໃນປັດຈຸບັນ ໃຫ້ມີປະສິດທິຜົນກວ່າເກົ່າ; ສືບຕໍ່ສ້າງຄູ່ຮ່ວມຊາຕາກໍາ ທີ່ຕັດແຍກອອກຈາກກັນບໍ່ໄດ້; ສືບຕໍ່ຈັດຕັ້ງຜັນຂະຫຍາຍແຜນການຮ່ວມມື 2 ພັກ ໄລຍະສົກປີ 2016-2020 ໃນການກໍ່ສ້າງພະນັກງານ ນໍາພາຄຸ້ມຄອງ ຂອງພັກ-ລັດ ລາວ ຢູ່ຈີນ; ສືບຕໍ່ເພີ່ມທະວີການຮ່ວມມື ເພື່ອເຊື່ອມໂຍງຍຸດທະສາດ “ການຫັນປະເທດບໍ່ມີຊາຍແດນຕິດກັບທະເລ ເປັນປະເທດທາງຜ່ານ ເຊື່ອມໂຍງເຊື່ອມຈອດ” ຂອງລາວເຂົ້າກັບຍຸດທະສາດ“; ໜຶ່ງແລວ ໜຶ່ງເສັ້ນທາງ” ຂອງຈີນ ເພື່ອນໍາເອົາຜົນປະໂຫຍດຕົວຈິງ ມາສູ່ ປະຊາຊົນ 2 ຊາດ.
ພາຍຫລັງ ການພົບປະສອງຝ່າຍ, ສະຫາຍ ເລຂາທິການໃຫຍ່ ບຸນຍັງ ວໍລະຈິດ ແລະ ສະຫາຍ ເລຂາທິການໃຫຍ່ ສີ ຈິ້ນຜິງ ໄດ້ເປັນສັກຂີພິຍານ ໃນການລົງນາມ ບັນດາເອກະສານການຮ່ວມມື ຈຳນວນ 17 ສະບັບ ຄື: ສັນຍາການຮ່ວມມື ລະຫວ່າງ ກະຊວງການຕ່າງປະເທດ ສປປ ລາວ ແລະ ກະຊວງການຕ່າງປະເທດ ສປ ຈີນ ກ່ຽວກັບການເພີ່ມທະວີ ການຮ່ວມມື ໃນສະພາບການໃໝ່; ບົດບັນທຶກຄວາມເຂົ້າໃຈ ວ່າດ້ວຍການຮ່ວມກັນ ກໍ່ສ້າງແລວທາງ ເສດຖະກິດລາວ-ຈີນ; ບົດບັນທຶກຄວາມເຂົ້າໃຈ ວ່າດ້ວຍການເພີ່ມທະວີ ການພັດທະນາ ເສັ້ນທາງສາຍໄໝ ດີຈີຕອນຂໍ້ມູນຂ່າວສານ ເພື່ອຊຸກຍູ້ການເຊື່ອມຈອດ ຂໍ້ມູນຂ່າວສານ; ສັນຍາວ່າດ້ວຍ ການຮ່ວມມືດ້ານວິິທະຍາສາດ ແລະ ເຕັກໂນໂລຊີ; ບົດບັນທຶກຄວາມເຂົ້າໃຈ ວ່າດ້ວຍການຈັດຕັ້ງ ປະຕິບັດ ຮ່ວມໂຄງການໂຕແບບ ໃນການສ້າງສູນຂໍ້ມູນຂ່າວສານ ຊັບພະຍາກອນນໍ້າແຫ່ງຊາດ ແລະ ການສ້າງ ແຜນແມ່ບົດ ການຄຸ້ມຄອງອ່າງຮັບນໍ້າອູ ແລະ ນໍ້າເທີນ-ນໍ້າກະດິງ; ບົດບັນທຶກຄວາມເຂົ້າໃຈ ວ່າດ້ວຍການຮ່ວມກັນ ຊຸກຍູ້ສ້າງເຂດຕົວແບບ ພັດທະນາກະສິກໍາຄົບວົງຈອນ ທີ່ທັນສະໄໝ; ບົດບັນທຶກຄວາມເຂົ້າໃຈ ກ່ຽວກັບການເພີ່ມທະວີ ການຮ່ວມມື ໃນຂົງເຂດພື້ນຖານ ໂຄ່ງລ່າງ; ບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ດ້ານການຊ່ວຍເຫລືອ ໃນ 3 ປີຕໍ່ຫນ້າ; ບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ດ້ານພັດທະນາ ຊັບພະຍາກອນມະນຸດ; ສານແລກປ່ຽນ ວ່າດ້ວຍຝ່າຍຈີນ ເຫັນດີກໍານົດເອົາໂຄງການປັບປຸງ ແລະ ຍົກລະດັບລະບົບ ICT ຂອງກະຊວງອຸດສາຫະກໍາ ແລະ ການຄ້າ ສປປ ລາວ; ສັນຍາຂອບ ສະໜອງເງິນກູ້ພິເສດໃຫ້ແກ່ ສປປ ລາວ ເພື່ອຈັດຕັ້ງປະຕິບັດໂຄງການ ເຂື່ອນໄຟຟ້າຫ້ວຍປາຫລາຍ; ບົດບັນທຶກຄວາມເຂົ້າໃຈ ການສ້າງຄູ່ຮ່ວມມື ຍຸດທະສາດ ດ້ານການຮ່ວມມືໄຟຟ້າ; ບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ທາງດ້ານການເງິນ ເພື່ອສົ່ງເສີມວິສາຫະກິດ ຂະຫນາດນ້ອຍ ແລະ ກາງ ໃນ ສປປ ລາວ; ສັນຍາເງິນກູ້ພິເສດ ດອກເບ້ຍຕໍ່າ ໂຄງການເຂື່ອນໄຟຟ້າ ຫ້ວຍປາຫລາຍ; ສັນຍາເງິນກູ້ທຸລະກິດ ໂຄງການສາຍສົ່ງ 115 (ກິໂລໂວນ) ຊຽງຮ່ອນ-ຫົງສາ; ສັນຍາຮ່ວມທຶນ ສ້າງໂຄງການກໍ່ສ້າງທາງດ່ວນ ນະຄອນຫລວງວຽງຈັນ ຫາບໍ່ເຕັນຕອນທີ I ນະຄອນຫລວງວຽງຈັນ ຫາ ວັງວຽງ; ສັນຍາເງິນກູ້ ທຸລະກິດໂຄງການສາຍສົ່ງ 500/230 KV ອ້ອມນະຄອນຫລວງວຽງຈັນ.
ສປ ຈີນ ແຈ້ງໃຫ້ການຊ່ວຍເຫລືອ ສປປ ລາວ 4 ຕື້ຢວນ, ໃນໄລຍະ 3 ປີ ຕໍ່ໜ້າ ພ້ອມທັງ ໃຫ້ການຊ່ວຍເຫລືອປັບປຸງຊີວິດການເປັນຢູ່ຂອງ ປະຊາຊົນລາວ ໃນ 8 ໂຄງການໃໝ່. ພ້ອມດຽວກັນນີ້, ສະຫາຍ ສີ ຈິ້ນຜິງ ໄດ້ເຊື້ອເຊີນ ສະຫາຍ ບຸນຍັງ ວໍລະຈິດ ຢ້ຽມຢາມ ສປ ຈີນ ໃນເວລາເໝາະສົມ ໃນປີໜ້າ.
ໃນຕອນຄໍ່າຂອງວັນດຽວກັນ, ສະຫາຍເລຂາທິການໃຫຍ່ ບຸນຍັງ ວໍລະຈິດ ໄດ້ເປັນເຈົ້າພາບຈັດງານລ້ຽງຕ້ອນຮັບເປັນກຽດແດ່ສະຫາຍເລຂາທິການ ໃຫຍ່ ສີ ຈິ້ນຜິງ ພ້ອມດ້ວຍຄະນະຜູ້ແທນຂັ້ນສູງພັກ, ລັດ ຈີນ ທີ່ທຳນຽບປະທານປະເທດ, ໂດຍມີບັນດາການນໍາຂັ້ນສູງພັກ-ລັດ ສປ ຈີນ ແລະ ສປປ ລາວ ເຂົ້າຮ່ວມຢ່າງພ້ອມພຽງ.
ເນື້ອໃນ: ຂປລ
ວັນທີ 3 ພະຈິກ 2017 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງບໍ່ແກ້ວ ເຊິ່ງມີ ທ່ານ ຄຳພັນ ເຜີຍຍະວົງ ເຈົ້າແຂວງໆບໍ່ແກ້ວ ມີບັນດາຮອງເຈົ້າແຂວງ, ຄະນະພັກ-ຄະນະນຳແຂວງ, ພະແນກການ, ອຳນາດການປົກຄອງທ້ອງຖິ່ນ ແລະ ພໍ່ແມ່ປະຊາຊົນຊາວແຂວງບໍ່ແກ້ວ ໃຫ້ການຕ້ອນຮັບຢ່າງອົບອຸ່ນ.
ໂອກາດນີ້, ທ່ານ ຄຳພັນ ເຜີຍຍະວົງ ໄດ້ລາຍງານໃຫ້ຊາບ ກ່ຽວກັບສະພາບການນໍາພາ ພັດທະນາຂອງແຂວງ ໃນໄລຍະຜ່ານມາ ໂດຍສະເພາະ ແມ່ນໄດ້ເອົາໃຈໃສ່ທາງດ້ານການເມືອງ-ແນວຄິດ, ສຸມໃສ່ຊີ້ນໍາການປັບປຸງກໍ່ສ້າງພັກຕາມ 5 ຫຼັກການ 3 ທິດນໍາ, ພ້ອມກັນເປີດບັ້ນດໍາເນີນຊີວິດການເມືອງປັບປຸງປົວແປງທົ່ວອົງຄະນະພັກແຂວງ ປະຈໍາປີ 2017 ຕາມຄໍາສັ່ງເລກທີ 01 ຂອງກົມການເມືອງສູນກາງພັກ, ໄດ້ສໍາເລັດການດໍາເນີນກອງປະຊຸມສະພາປະຊາຊົນແຂວງສະໄໝສາມັນຄັ້ງທີ 3 ສະໄໝທີ I, ສືບຕໍ່ຫັນລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ; ສໍາລັບດ້ານການພັດທະນາເສດຖະກິດ-ສັງຄົມ ແມ່ນໄດ້ເອົາໃຈໃສ່ຈັດຕັ້ງບັນດາໂຄງການລົງທຶນຂອງລັດ ຄຽງຄູ່ກັບການຍາດແຍ່ງ ດູດດຶງການລົງທຶນ, ການປະກອບສ່ວນ ຈາກພາກສ່ວນເສດຖະກິດຕ່າງໆ ດ້ວຍຫຼາຍຮູບການ, ທັງໄດ້ຈັດກອງປະຊຸມສໍາມະນາສົ່ງເສີມການທ່ອງທ່ຽວ ແລະ ດໍາເນີນກອງປະຊຸມພົບປະລະຫວ່າງອົງການປົກຄອງແຂວງ ກັບພາກທຸລະກິດ ຕິດພັນກັບການຈັດງານຕະຫຼາດນັດວາງສະແດງສິນຄ້າ, ສົ່ງເສີມການຜະລິດ ແລະ ເປີດກວ້າງຕະຫຼາດຈຳໜ່າຍສິນຄ້າ ເຮັດໃຫ້ເສດຖະກິດຂອງແຂວງ ໄດ້ຮັບການພັດທະນາຢ່າງຕໍ່ເນື່ອງ ແລະ ຖືກທິດ ລວມຍອດຜະລິດຕະພັນພາຍໃນ (GDP) ສາມາດບັນລຸໄດ້ 2.486 ກວ່າຕື້ກີບ, ຂະຫຍາຍຕົວໃນລະດັບ 7,3%, ລາຍຮັບສະເລ່ຍໄດ້ 1.652 ໂດລາສະຫະລັດຕໍ່ຄົນຕໍ່ປີ ຖ້າທຽບໃສ່ແຜນການປະຕິບັດໄດ້ 93%, ການລົງທຶນຂອງລັດ ທີ່ໄດ້ຮັບການອະນຸມັດຈາກສະພາແຫ່ງຊາດ ມີ 120 ໂຄງການ ມູນຄ່າ 113 ກວ່າຕື້ກີບ, ຈັດຕັ້ງປະຕິບັດຕົວຈິງ 104 ໂຄງການ ມູນຄ່າ 37 ກວ່າຕື້ກີບ ເທົ່າກັບ 90% ຂອງແຜນການປີ; ດ້ານການຈັດຕັ້ງປະຕິບັດແຜນງົບປະມານໃນ 10 ເດືອນຕົ້ນປີ ສາມາດຈັດເກັບລາຍຮັບໄດ້ 68 ກວ່າຕື້ກັບ ເທົ່າກັບ 74,29% ຂອງແຜນການປີ.
ນອກຈາກນີ້, ຍັງໄດ້ເອົາໃຈໃສ່ຊຸກຍູ້ການຜະລິດເຂົ້ານາປີ 2017 ໃນເນື້ອທີ່ 14.600 ກວ່າເຮັກຕາ, ຄາດຄະເນຜົນຜະລິດ 64.700 ກວ່າໂຕນ, ເຂົ້າໄຮ່ໝູນວຽນ ມີເນື້ອທີ່ 7.200 ກວ່າເຮັກຕາ, ຄາດຄະເນຜົນຜະລິດ 13.000 ກວ່າໂຕນ. ສ່ວນການຜະລິດສິນຄ້າ ປະກອບມີ ເຂົ້າ, ໝາກເດືອຍ, ໝາກ້ວຍ, ຢາງພາລາ ແລະ ລ້ຽງສັດ. ໃນນັ້ນ, ການປູກເຂົ້າເປັນສິນຄ້າ ພວກເຮົາສຸມໃສ່ໃນ 2 ເມືອງ ຄື: ເມືອງຜາອຸດົມ ແລະ ເມືອງປາກທາ ໄດ້ຈັດຕັ້ງເປັນ 5 ກຸ່ມບ້ານ, ມີ 762 ຄອບຄົວ, ມີເນື້ອທີ່ທັງໝົດ 840 ເຮັກຕາ ສາມາດເຮັດນາແຊງໄດ້ 750 ເຮັກຕາ. ສິນຄ້າ 01 ເມືອງ 01 ຜະລິດຕະພັນ (ODOP) ມີຄື: ຫວາຍຂາມປ້ອມ, ກົງສະເດັນ, ເຈຍລະໄນແກ້ວ ແລະ ຜ້າຝ້າຍ; ໄດ້ເອົາໃຈໃສ່ຫັນລົງກໍ່ສ້າງຮາກຖານການເມືອງ ພັດທະນາຊົນນະບົດ, ລຶບລ້າງຄວາມທຸກຍາກ ຕາມ 4 ເນື້ອໃນ 4 ຄາດໝາຍ ຕິດພັນກັບການຈັດຕັ້ງປະຕິບັດວຽກງານ 3 ສ້າງ ໂດຍໄດ້ຈັດຕັ້ງຝຶກອົບຮົມ ແລະ ສົ່ງພະນັກງານຫຼັກແຫຼ່ງ ຂອງແຂວງ-ເມືອງ ລົງປະຈຳຢູ່ບ້ານ ແລະ ຈຸດສຸມຂອງແຂວງ ເພື່ອນໍາພາປັບປຸງລະບົບການເມືອງຢູ່ຮາກຖານ ໃຫ້ມີຄວາມໜັກແໜ້ນເຂັ້ມແຂງ, ກາຍເປັນກຳລັງແຮງໃຫ້ແກ່ການປົກປັກຮັກສາ ແລະ ພັດທະນາແຂວງບໍ່ແກ້ວ. ປະຈຸບັນ, ທົ່ວແຂວງຍັງມີບ້ານທຸກຍາກ 41 ບ້ານ. ໃນນີ້, ໄດ້ສຸມໃສ່ສ້າງແຜນແກ້ໄຂຄວາມທຸກຍາກ ຈໍານວນ 10 ບ້ານ (ເມືອງລະ 2 ບ້ານ).
ໂອກາດນີ້, ທ່ານນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍ ຕໍ່ບັນດາຜົນງານ ທີ່ຄະນະພັກ-ຄະນະນຳແຂວງ ໄດ້ພ້ອມພຽງຮຽງໜ້າກັບພໍ່ແມ່ປະຊາຊົນຊາວແຂວງບໍ່ແກ້ວ ບຸກບືນພັດທະນາບັນດາພື້ນຖານໂຄງລ່າງ ແລະ ປັດໄຈຕ່າງໆ ເຮັດໃຫ້ແຂວງບໍ່ແກ້ວ ມີໃບໜ້າອັນໃໝ່ຂຶ້ນມາຢ່າງຫຼວງຫຼາຍ. ພ້ອມນີ້, ທ່ານຍັງໄດ້ຍົກໃຫ້ເຫັນ ສະພາບການພົ້ນເດັ່ນ ທີ່ເກີດຂຶ້ນໃນພາກພື້ນ ແລະ ສາກົນ ອັນເປັນຜົນກະທົບທັງທາງດ້ານບວກ ແລະ ດ້ານລົບ ຕໍ່ປະເທດເຮົາ. ຍົກໃຫ້ເຫັນໝາກຜົນຂອງການຈັດຕັ້ງປະຕິບັດວຽກງານ ໃນໄລຍະຊຸມປີທີ່ຜ່ານມາ ຂອງຄະນະລັດຖະບານ ຊຸດທີ 8 ທີ່ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ 8; ສຳລັບປີ 2018 ກໍ່ຍັງມີບັນດາສິ່ງທ້າທາຍຕ່າງໆ ທີ່ຈະຕ້ອງໄດ້ເອົາໃຈໃສ່ ເປັນຕົ້ນ ການແກ້ໄຂຄວາມທຸກຍາກ ໃນໄລຍະ 2 ປີຂ້າງໜ້າ ທີ່ຈະຕ້ອງໄດ້ມີການສະຫຼຸບຕີລາຄາຄືນ. ໃນຂະນະທີ່ ດ້ານເສດຖະກິດ ກໍ່ຍັງພົບບັນຫາຂໍ້ຫຍຸ້ງຍາກຫຼາຍປະການ. ດັ່ງນັ້ນ, ບັນດາຂະແໜງການ ແລະ ທ້ອງຖິ່ນ ຕ້ອງໄດ້ພ້ອມກັນແກ້ໄຂ ບັນດາກົນໄກ ແລະ ກວດກາຄືນ ການຈັດຕັ້ງປະຕິບັດວຽກງານ ໃນແຕ່ລະຂົງເຂດ ຖ້າຕິດຂັດຢູ່ຈຸດໃດ ໃຫ້ແກ້ໄຂຢູ່ຈຸດນັ້ນ ກ້າວໄປສູ່ການບໍລິຫານວຽກງານ ໃຫ້ດີຂຶ້ນເປັນກ້າວໆ; ສ່ວນແຂວງບໍ່ແກ້ວ ເປັນແຂວງທີ່ໄດ້ສ້າງພື້ນຖານອັນໜັກແໜ້ນ ແລະ ມີເງື່ອນໄຂສະດວກຫຼາຍດ້ານ ກໍ່ຂໍໃຫ້ເປັນຕົວຢ່າງ ໃນການຈັດຕັ້ງປະຕິບັດບັນດານິຕິກຳ ກໍ່ຄືແນວທາງນະໂຍບາຍຂອງ ພັກ ແລະ ລັດຖະບານ ວາງອອກໃນແຕ່ລະໄລຍະ ອັນເປັນການສ້າງຄວາມເຊື່ອໝັ້ນ ໃຫ້ແກ່ປະຊາຊົນ; ໃຫ້ພ້ອມກັນປົດປ່ອຍສິ່ງທີ່ຕິດຂັດ ໂດຍການຈັດຕັ້ງປະຕິບັດ 3 ເປີດ ຄື: ເປີດປະຕູ, ເປີດສິ່ງກີດຂວາງ ແລະ ເປີດໃຈ ເພື່ອດຶງດູດການລົງທຶນ ແຕ່ກໍ່ຕ້ອງມີການຕິດຕາມກວດກາຄືນ ໃນບັນດາໂຄງການລົງທຶນເຫຼົ່ານັ້ນ ເພື່ອເຮັດໃຫ້ຕ່າງຝ່າຍ ຕ່າງໄດ້ຮັບຜົນປະໂຫຍດ ໂດຍສະເພາະ ປະຊາຊົນຢູ່ໃນທ້ອງຖິ່ນ; ຊຸກຍູ້ໃຫ້ປະຊາຊົນ ຮູ້ທຳມາຫາກິນ ດ້ວຍວິທີການໃໝ່ ຮູ້ທຳການຜະລິດ-ຮູ້ຄ້າຂາຍ ຕາມກົນໄກຕະຫຼາດ ປົດປ່ອຍການຮັກສາເດີມ ໄປສູ່ແນວຄິດໃໝ່.
ນອກຈາກນີ້, ຍັງໄດ້ເອົາໃຈໃສ່ຊຸກຍູ້ການຜະລິດເຂົ້ານາປີ 2017 ໃນເນື້ອທີ່ 14.600 ກວ່າເຮັກຕາ, ຄາດຄະເນຜົນຜະລິດ 64.700 ກວ່າໂຕນ, ເຂົ້າໄຮ່ໝູນວຽນ ມີເນື້ອທີ່ 7.200 ກວ່າເຮັກຕາ, ຄາດຄະເນຜົນຜະລິດ 13.000 ກວ່າໂຕນ. ສ່ວນການຜະລິດສິນຄ້າ ປະກອບມີ ເຂົ້າ, ໝາກເດືອຍ, ໝາກ້ວຍ, ຢາງພາລາ ແລະ ລ້ຽງສັດ. ໃນນັ້ນ, ການປູກເຂົ້າເປັນສິນຄ້າ ພວກເຮົາສຸມໃສ່ໃນ 2 ເມືອງ ຄື: ເມືອງຜາອຸດົມ ແລະ ເມືອງປາກທາ ໄດ້ຈັດຕັ້ງເປັນ 5 ກຸ່ມບ້ານ, ມີ 762 ຄອບຄົວ, ມີເນື້ອທີ່ທັງໝົດ 840 ເຮັກຕາ ສາມາດເຮັດນາແຊງໄດ້ 750 ເຮັກຕາ. ສິນຄ້າ 01 ເມືອງ 01 ຜະລິດຕະພັນ (ODOP) ມີຄື: ຫວາຍຂາມປ້ອມ, ກົງສະເດັນ, ເຈຍລະໄນແກ້ວ ແລະ ຜ້າຝ້າຍ; ໄດ້ເອົາໃຈໃສ່ຫັນລົງກໍ່ສ້າງຮາກຖານການເມືອງ ພັດທະນາຊົນນະບົດ, ລຶບລ້າງຄວາມທຸກຍາກ ຕາມ 4 ເນື້ອໃນ 4 ຄາດໝາຍ ຕິດພັນກັບການຈັດຕັ້ງປະຕິບັດວຽກງານ 3 ສ້າງ ໂດຍໄດ້ຈັດຕັ້ງຝຶກອົບຮົມ ແລະ ສົ່ງພະນັກງານຫຼັກແຫຼ່ງ ຂອງແຂວງ-ເມືອງ ລົງປະຈຳຢູ່ບ້ານ ແລະ ຈຸດສຸມຂອງແຂວງ ເພື່ອນໍາພາປັບປຸງລະບົບການເມືອງຢູ່ຮາກຖານ ໃຫ້ມີຄວາມໜັກແໜ້ນເຂັ້ມແຂງ, ກາຍເປັນກຳລັງແຮງໃຫ້ແກ່ການປົກປັກຮັກສາ ແລະ ພັດທະນາແຂວງບໍ່ແກ້ວ. ປະຈຸບັນ, ທົ່ວແຂວງຍັງມີບ້ານທຸກຍາກ 41 ບ້ານ. ໃນນີ້, ໄດ້ສຸມໃສ່ສ້າງແຜນແກ້ໄຂຄວາມທຸກຍາກ ຈໍານວນ 10 ບ້ານ (ເມືອງລະ 2 ບ້ານ).
ໂອກາດນີ້, ທ່ານນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍ ຕໍ່ບັນດາຜົນງານ ທີ່ຄະນະພັກ-ຄະນະນຳແຂວງ ໄດ້ພ້ອມພຽງຮຽງໜ້າກັບພໍ່ແມ່ປະຊາຊົນຊາວແຂວງບໍ່ແກ້ວ ບຸກບືນພັດທະນາບັນດາພື້ນຖານໂຄງລ່າງ ແລະ ປັດໄຈຕ່າງໆ ເຮັດໃຫ້ແຂວງບໍ່ແກ້ວ ມີໃບໜ້າອັນໃໝ່ຂຶ້ນມາຢ່າງຫຼວງຫຼາຍ. ພ້ອມນີ້, ທ່ານຍັງໄດ້ຍົກໃຫ້ເຫັນ ສະພາບການພົ້ນເດັ່ນ ທີ່ເກີດຂຶ້ນໃນພາກພື້ນ ແລະ ສາກົນ ອັນເປັນຜົນກະທົບທັງທາງດ້ານບວກ ແລະ ດ້ານລົບ ຕໍ່ປະເທດເຮົາ. ຍົກໃຫ້ເຫັນໝາກຜົນຂອງການຈັດຕັ້ງປະຕິບັດວຽກງານ ໃນໄລຍະຊຸມປີທີ່ຜ່ານມາ ຂອງຄະນະລັດຖະບານ ຊຸດທີ 8 ທີ່ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ 8; ສຳລັບປີ 2018 ກໍ່ຍັງມີບັນດາສິ່ງທ້າທາຍຕ່າງໆ ທີ່ຈະຕ້ອງໄດ້ເອົາໃຈໃສ່ ເປັນຕົ້ນ ການແກ້ໄຂຄວາມທຸກຍາກ ໃນໄລຍະ 2 ປີຂ້າງໜ້າ ທີ່ຈະຕ້ອງໄດ້ມີການສະຫຼຸບຕີລາຄາຄືນ. ໃນຂະນະທີ່ ດ້ານເສດຖະກິດ ກໍ່ຍັງພົບບັນຫາຂໍ້ຫຍຸ້ງຍາກຫຼາຍປະການ. ດັ່ງນັ້ນ, ບັນດາຂະແໜງການ ແລະ ທ້ອງຖິ່ນ ຕ້ອງໄດ້ພ້ອມກັນແກ້ໄຂ ບັນດາກົນໄກ ແລະ ກວດກາຄືນ ການຈັດຕັ້ງປະຕິບັດວຽກງານ ໃນແຕ່ລະຂົງເຂດ ຖ້າຕິດຂັດຢູ່ຈຸດໃດ ໃຫ້ແກ້ໄຂຢູ່ຈຸດນັ້ນ ກ້າວໄປສູ່ການບໍລິຫານວຽກງານ ໃຫ້ດີຂຶ້ນເປັນກ້າວໆ; ສ່ວນແຂວງບໍ່ແກ້ວ ເປັນແຂວງທີ່ໄດ້ສ້າງພື້ນຖານອັນໜັກແໜ້ນ ແລະ ມີເງື່ອນໄຂສະດວກຫຼາຍດ້ານ ກໍ່ຂໍໃຫ້ເປັນຕົວຢ່າງ ໃນການຈັດຕັ້ງປະຕິບັດບັນດານິຕິກຳ ກໍ່ຄືແນວທາງນະໂຍບາຍຂອງ ພັກ ແລະ ລັດຖະບານ ວາງອອກໃນແຕ່ລະໄລຍະ ອັນເປັນການສ້າງຄວາມເຊື່ອໝັ້ນ ໃຫ້ແກ່ປະຊາຊົນ; ໃຫ້ພ້ອມກັນປົດປ່ອຍສິ່ງທີ່ຕິດຂັດ ໂດຍການຈັດຕັ້ງປະຕິບັດ 3 ເປີດ ຄື: ເປີດປະຕູ, ເປີດສິ່ງກີດຂວາງ ແລະ ເປີດໃຈ ເພື່ອດຶງດູດການລົງທຶນ ແຕ່ກໍ່ຕ້ອງມີການຕິດຕາມກວດກາຄືນ ໃນບັນດາໂຄງການລົງທຶນເຫຼົ່ານັ້ນ ເພື່ອເຮັດໃຫ້ຕ່າງຝ່າຍ ຕ່າງໄດ້ຮັບຜົນປະໂຫຍດ ໂດຍສະເພາະ ປະຊາຊົນຢູ່ໃນທ້ອງຖິ່ນ; ຊຸກຍູ້ໃຫ້ປະຊາຊົນ ຮູ້ທຳມາຫາກິນ ດ້ວຍວິທີການໃໝ່ ຮູ້ທຳການຜະລິດ-ຮູ້ຄ້າຂາຍ ຕາມກົນໄກຕະຫຼາດ ປົດປ່ອຍການຮັກສາເດີມ ໄປສູ່ແນວຄິດໃໝ່.
ໃນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ໃນວັນທີ 2 ພະຈິກ 2017 ໂດຍການເປັນປະທານຂອງ ທ່ານ ບຸນປອນ ບຸດຕະນະວົງ ຮອງປະທານ ສະພາແຫ່ງຊາດ ໄດ້ພ້ອມກັນພິຈະລະນາ, ປະກອບຄຳຄິດຄຳເຫັນ ໃສ່ຮ່າງກົດໝາຍວ່າດ້ວຍ ການຈັດຊື້-ຈັດຈ້າງ ດ້ວຍທຶນຂອງລັດ, ເຊິ່ງເປັນກົດໝາຍສ້າງໃໝ່ ທີ່ສະເໜີໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ.
ໃນວາລະດຳເນີນກອງປະຊຸມ, ທ່ານ ສົມດີ ດວງດີ ໄດ້ຂຶ້ນລາຍງານ ກ່ຽວກັບຮ່າງກົດໝາຍວ່າດ້ວຍ ການຈັດຊື້-ຈັດຈ້າງ ດ້ວຍທຶນຂອງລັດ (ສ້າງໃໝ່), ໂດຍທ່ານ ໄດ້ຍົກໃຫ້ເຫັນສະພາບ ຄວາມເປັນມາໃນການຄົ້ນຄວ້າ, ເຫດຜົນ ແລະ ຄວາມຈຳເປັນ ໃນການສ້າງຮ່າງກົດໝາຍ ວ່າດ້ວຍການຈັດຊື້-ຈັດຈ້າງ ດ້ວຍທຶນຂອງລັດ ເຊິ່ງການຄົ້ນຄວ້າ ສ້າງຮ່າງກົດໝາຍດັ່ງກ່າວ, ເນື້ອໃນຫລັກແມ່ນ ບົນພື້ນຖານການປັບປຸງ ຈາກເນື້ອໃນຂອງດຳລັດ ວ່າດ້ວຍການຈັດຊື້-ຈັດຈ້າງສິນຄ້າ, ການກໍ່ສ້າງສອມແປງ ແລະ ການບໍລິການ ດ້ວຍທຶນຂອງລັດ (ສະບັບປັບປຸງ) ສະບັບເລກທີ 03/ນຍ, ລົງວັນທີ 9 ມັງກອນ 2004, ໂດຍໄດ້ປ່ຽນແທນຊື່ ຈາກດຳລັດດັ່ງກ່າວ ມາເປັນກົດໝາຍວ່າດ້ວຍ ການຈັດຊື້-ຈັດຈ້າງ ດ້ວຍທຶນຂອງລັດ ເພື່ອເປັນເຄື່ອງມື ທາງດ້ານນິຕິກຳທີ່ໜັກແໜ້ນ ໃນການປະຕິບັດວຽກງານ ຈັດຊື້-ຈັດຈ້າງ ດ້ວຍທຶນຂອງລັດ ທັງເປັນການເຮັດໃຫ້ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ ໃຫ້ມີປະສິດທິຜົນ ແລະ ເຂັ້ມງວດໃນການປະຕິບັດ ລັດຖະທຳມະນູນ, ກົດໝາຍ, ນິຕິກຳຕ່າງໆ ທີ່ກ່ຽວຂ້ອງ ແລະ ໃຫ້ສອດຄ່ອງກັບ ຫລາຍປະເທດໃນພາກພື້ນ ແລະ ອື່ນໆ.
ຫລັງຈາກນັ້ນ, ທ່ານ ບຸນປອນ ບຸດຕະນະວົງ ປະທານກອງປະຊຸມ ໄດ້ມີຄຳຖາມ ເຈາະຈີ້ມບາງ ໝວດ, ບາງມາດຕາ ແລະ ບັນດາສະມາຊິກ ສະພາແຫ່ງຊາດແຕ່ລະເຂດ ໄດ້ປະກອບ ຄຳຄິດຄຳເຫັນ ຢ່າງກົງໄປກົງມາ ໃສ່ຮ່າງກົດໝາຍດັ່ງກ່າວ, ເຊິ່ງໂດຍລວມແລ້ວ ແມ່ນເຫັນດີເປັນເອກະພາບ ເປັນພື້ນຖານ ທາງດ້ານເນື້ອໃນ, ໂຄງສ້າງ, ແຕ່ຍັງມີບາງໝວດ, ບາງມາດຕາ ທີ່ຈະຕ້ອງໄດ້ປັບປຸງ, ດັດແກ້, ຕັດອອກ ແລະ ເຕີ່ມໃສ່ບາງຄຳສັບ ເພື່ອໃຫ້ສອດຄ່ອງ, ຖືກຕ້ອງ ແລະ ຊັດເຈນ ກັບສະພາບຄວາມເປັນຈິງ. ພ້ອມດຽວກັນນັ້ນ, ກໍເຫັນດີເປັນເອກະພາບ ຮັບຮອງເອົາກົດໝາຍວ່າ ດ້ວຍການຈັດຊື້-ຈັດຈ້າງ ດ້ວຍທຶນຂອງລັດ ດ້ວຍຄະແນນສຽງເຫັນດີ ເປັນສ່ວນຫລາຍ. ກອງປະຊຸມຍັງໄດ້ສະເໜີ ໃຫ້ອະນຸກຳມະການເນື້ອໃນກົດໝາຍ ນຳເອົາຄຳຄິດຄຳເຫັນຂອງ ສສຊ ໄປປັບປຸງໃສ່ກົດໝາຍດັ່ງກ່າວ ໃຫ້ເໝາະສົມ ແລະ ຖືກຕ້ອງສອດຄ່ອງ ກັບຄວາມເປັນຈິງ, ທັງນີ້ກໍເພື່ອເຮັດໃຫ້ກົດໝາຍ ວ່າດ້ວຍການຈັດຊື້-ຈັດຈ້າງ ດ້ວຍທຶນຂອງລັດ ມີຄວາມສັກສິດ ແລະ ສາມາດນຳໄປຈັດຕັ້ງປະຕິບັດ ໄດ້ຢ່າງມີປະສິດທິຜົນ.
ไม่มีความคิดเห็น:
แสดงความคิดเห็น